Husam Zomlot, kreu i misionit palestinez në Mbretërinë e Bashkuar, ka publikuar një video në rrjetet sociale që tregon pasojat e sulmeve ajrore izraelite mbi spitalin al-Ahli në Gaza.
Zomlot deklaroi se sulmi nuk është një rast i izoluar, duke theksuar se “bombardimi i Spitalit Anglikan ka dy qëllime: të shkatërrojë spitalin e fundit që funksionon pjesërisht në qytetin e Gazës dhe, në Ditën e Palmave, të godasë praninë e fundit të krishterë palestineze në Gaza”.
Spitali al-Ahli, i cili është i lidhur me komunitetin anglikan dhe ka ofruar ndihmë mjekësore gjatë gjithë luftës, është një nga të paktët objekte shëndetësore që ka vazhduar të operojë në veri të Rripit të Gazës.
Këto sulme kanë ngjallur reagime të ashpra ndërkombëtare dhe janë parë si përshkallëzim i mëtejshëm i krizës humanitare në territorin palestinez.
