Një zyrtar i lartë shëndetësor në Rripin e Gazës njoftoi se Ministria e Shëndetësisë ka dokumentuar 4.500 amputime, duke përfshirë gjymtyrët e sipërme dhe të poshtme, që nga fillimi i luftës gjenocidale izraelite kundër enklavës palestineze, transmeton Anadolu.
“Ne kemi regjistruar 4.500 raste të amputimit deri në fund të vitit 2024, si rezultat i sulmeve ajrore të vazhdueshme izraelite dhe sulmeve tokësore në Gaza”, tha në një deklaratë Zaher Al-Wahidi, kreu i Njësisë së Informacionit Shëndetësor në ministri.
Ai raportoi se rreth 800 nga të amputuarit ishin fëmijë, duke përbërë 18 për qind të rasteve, ndërsa 540 gra përbëjnë 12 për qind të amputimeve.
Wahidi theksoi se shifrat tregojnë përmasat e katastrofës humanitare me të cilën përballet popullata civile, veçanërisht grupet më të rrezikuara – fëmijët dhe gratë.
Ai shtoi se numri i amputimeve ka të ngjarë të vazhdojë të rritet ndërsa lufta gjenocidale vazhdon, duke përkeqësuar tendosjen tashmë të rëndë në sistemin e kujdesit shëndetësor i cili po përballet me mungesa kritike të furnizimeve mjekësore për shkak të bllokadës që është vendosur për më shumë se 18 vjet.
Që nga fillimi i gjenocidit më 7 tetor 2023, ushtria izraelite ka shënjestruar qëllimisht objektet e kujdesit shëndetësor, duke bombarduar spitalet dhe duke detyruar evakuime, ndërsa ka bllokuar furnizimet thelbësore mjekësore.
Wahidi bëri thirrje urgjente për mbështetje ndërkombëtare për të adresuar krizën në përkeqësim, duke kërkuar veprim të menjëhershëm për të ndalur shkeljet izraelite dhe për të mbrojtur popullsinë civile.
Në përgjigje të numrit të lartë të amputimeve mes fëmijëve, Lisa Dutton, zyrtare në Zyrën e OKB-së për Koordinimin e Çështjeve Humanitare (OCHA), tha në tetor se Gaza ishte bërë “shtëpia e grupit më të madh të fëmijëve të amputuar në historinë moderne”.
Ushtria izraelite ka vazhduar një luftë gjenocidale në Gaza që ka vrarë më shumë se 46.000 viktima, kryesisht gra dhe fëmijë, pavarësisht një rezolute të Këshillit të Sigurimit të OKB-së që bën thirrje për armëpushim të menjëhershëm.
Gjykata Ndërkombëtare Penale lëshoi urdhra arresti në nëntor për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë palestineze.
