Bashar Masri, një biznesmen palestinezo-amerikan, ka dhënë dorëheqjen nga posti i tij në Këshillin e Dekanit në Shkollën e Qeverisjes Kennedy të Universitetit Harvard, sipas një raportimi të New York Post.
Kjo vjen disa ditë pasi Masri u akuzua nga gati 200 amerikanë — përfshirë të mbijetuar dhe të afërm të viktimave të sulmeve të 7 tetorit ndaj Izraelit — se ka ndihmuar në ndërtimin e infrastrukturës që i ka lejuar luftëtarët e Hamasit të realizojnë sulmet.
“Z. Masri ka dhënë dorëheqjen nga Këshilli i Dekanit. Padia paraqet akuza serioze që duhet të hetohen dhe adresohen përmes procesit ligjor”, ka thënë shkolla, sipas raportimit.
Paditësit, në një padi të ngritur në Gjykatën e Qarkut të SHBA-së për Distriktin e Kolumbisë, pretendojnë se prona të zhvilluara dhe të kontrolluara nga Masri përmbanin tunele të fshehura që janë përdorur nga Hamasi përpara dhe pas 7 tetorit. Zyra e Masrit e ka quajtur padinë “të pabazë”.
Në Shtetet e Bashkuara dhe Bashkimin Evropian, Hamasi është i përcaktuar si një organizatë terroriste.
