Një tjetër gazetare palestineze është vrarë në një sulm izraelit në Rripin e Gazës, duke e çuar numrin e përgjithshëm të gazetarëve të vrarë që nga viti i kaluar në 193, tha sot një organizatë lokale, transmeton Anadolu.
Forumi i Gazetarëve Palestinezë e identifikoi viktimën e re si Eman Shanti, transmetuese e radios lokale Al-Aqsa, pas një sulmi izraelit në shtëpinë e familjes së saj në qytetin e Gazës.
Forumi dënoi heshtjen ndërkombëtare dhe dështimin për të mbrojtur gazetarët palestinezë për t’i lejuar ata të kryejnë detyrat e tyre profesionale në përputhje me ligjet ndërkombëtare dhe konventat humanitare.
Izraeli ka nisur një luftë gjenocidale në Rripin e Gazës që ka vrarë mbi 44.800 njerëz, kryesisht gra dhe fëmijë, që nga sulmi i Hamasit më 7 tetor të vitit të kaluar.
Muajin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij kundër Gazës.
