Të paktën 24 palestinezë u vranë dhe shumë të tjerë u plagosën sot në sulmet ajrore izraelite që shënjestruan të paktën pesë shtëpi dhe tubime civile në Rripin e Gazës, raporton Anadolu.
Shërbimi i mbrojtjes civile në një deklaratë tha se ushtria izraelite goditi një grumbullim civilësh në lagjen Shejaiya të qytetit të Gazës, duke rezultuar në shtatë të vrarë dhe disa të plagosur. Katër fëmijë dhe një grua ishin në mesin e të vrarëve.
Përpos kësaj, tre palestinezë u vranë dhe disa të tjerë u plagosën në një sulm në lagjen Sheikh Radwan të qytetit të Gazës, sipas mjekëve.
Mbrojtja civile njoftoi gjithashtu se gjeti dy kufoma dhe disa të tjerë të plagosur pas një sulmi në Khirbat al-Adas, në veri të qytetit Rafah.
Në pjesën qendrore të Gazës, një burim mjekësor konfirmoi se pesë palestinezë u vranë në sulmet ajrore në një shtëpi, një tendë dhe një tubim civil në Deir al-Balah.
Burimi shtoi se tre palestinezë, duke përfshirë një gazetar, u vranë kur një dron goditi një shtëpi në zonën al-Sawarha, në veri të qytetit të Zawaida.
Dy palestinezë të tjerë u vranë kur një dron goditi një shtëpi në jug të kampit të refugjatëve Nuseirat.
Ndërkohë, një grua iu nënshtrua plagëve nga një sulm ajror në një shtëpi familjare në Nuseirat mbrëmë vonë.
Në qytetin e Gazës, burimet mjekësore njoftuan edhe për një palestinez të vrarë dhe disa të tjerë të plagosën në një sulm ajror që synonte një apartament.
Dëshmitarët thanë se forcat detare izraelite bombarduan vijën bregdetare të Gazës dhe hapën zjarr drejt shtëpive përgjatë bregut. Ata raportuan gjithashtu prishjen e shtëpive në perëndim të kampit Jabalia, ku u dëgjuan shpërthime masive.
Ushtria izraelite ka vazhduar një luftë gjenocidale në Gaza duke vrarë më shumë se 45.650 persona, kryesisht gra dhe fëmijë, që nga sulmi i Hamasit më 7 tetor 2023, pavarësisht nga një rezolute të Këshillit të Sigurimit të OKB-së që bën thirrje për një armëpushim të menjëhershëm.
Në nëntor, Gjykata Ndërkombëtare Penale lëshoi urdhrarreste për kryeministrin Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me padi për gjenocid në Gjykatën Ndërkombëtare të Drejtësisë për luftën e tij në enklavë.
