Ushtria e Sudanit ka deklaruar se ka marrë nën kontroll qytetin e rëndësishëm Wad Madani, një nga fitoret më të mëdha në luftën gati dyvjeçare kundër forcave rebele.
Pamjet në mediat sociale treguan festime në rrugë ndërsa ushtarët e ushtrisë hynë në qytet. Kreu i grupit paramilitar Forcat e Mbështetjes së Shpejtë (RSF), gjenerali Mohamed Hamdan Dagalo, i njohur si Hemedti, pranoi humbjen në një mesazh audio. Ai fajësoi epërsinë ajrore të ushtrisë dhe përdorimin e dronëve të prodhuar nga Irani për disfatën, duke theksuar se lufta do të vazhdojë edhe për 20 vite nëse është e nevojshme.
Wad Madani, kryeqyteti i shtetit Al Jazira, ndodhet 140 kilometra në jug të kryeqytetit të Sudanit, Khartoum. Luftimet midis ushtrisë dhe RSF filluan në prill të vitit 2023 pas tensioneve të shkaktuara nga lëvizjet e RSF në të gjithë vendin, të cilat ushtria i pa si kërcënim.
Lufta ka shkaktuar dhjetëra mijëra viktima dhe ka zhvendosur rreth 9 milionë njerëz, sipas OKB-së, duke e kthyer këtë situatë në një nga “krizat më të mëdha të zhvendosjes” në botë. Gjysma e popullsisë së Sudanit, rreth 24.6 milionë njerëz, ka nevojë urgjente për ndihmë ushqimore, ndërsa vendi po përballet me një krizë urie.
Në fillim të muajit, Shtetet e Bashkuara vendosën sanksione kundër Hemedti, duke e akuzuar atë për genocid dhe krime sistematike kundër popullit sudanez gjatë konfliktit 20-mujor. /mesazhi
