Ush’tria meksikane përforcon sigurinë në shtetin Sinaloa pas arrestimit të liderëve të kartelit në SHBA

Ministria e Mbrojtjes Kombëtare e Meksikës ka dislokuar 200 ushtarë elitë të premten në shtetin veriperëndimor Sinaloa për të forcuar sigurinë pas arrestimit në SHBA të liderit famëkeq të Kartelit të Sinaloas, Ismael Zambada, transmeton Anadolu.

Mediat raportojnë se trupat u dislokuan nga Forcat Speciale të Meksikës që janë të krijuara për t’u marrë me kërcënimet e sigurisë kombëtare, antiterrorizmin dhe detyrat e shpëtimit të pengjeve.

Dislokimi pason kapjen e Zambadas dhe djalit të ish-kolegut të tij, Joaquin “Chapo” Guzman, në shtetin amerikan të Teksasit.

Grupet kriminale, veçanërisht Karteli i Sinaloas, janë përgjigjur në të kaluarën me dhunë pas arrestimit të drejtuesve të tyre të shquar, duke kryer sulme kundër popullatës.

Karteli i Sinaloas nisi sulme pas arrestimit të Ovidio Guzmanit, një tjetër nga djemtë e Chapos dhe drejtues i kartelit, që çoi në 15 vdekje dhe lirimin e Ovidios, gjë që u urdhërua nga presidenti meksikan Andres Manuel Lopez Obrador për të parandaluar dhunën e mëtejshme.

Në janar 2023, Ovidio u arrestua përsëri dhe karteli u përgjigj me të shtëna, djegie makinash dhe bllokime rrugësh, si dhe luftime me ushtrinë dhe policinë, duke rezultuar në 35 viktima.

Këtë herë, megjithatë, Ovidio u ekstradua në SHBA, ku mbetet i burgosur.

Zambada përballet me akuza të shumta penale që përfshijnë krimin e organizuar, pastrimin e parave dhe trafikun e drogës.

Karteli i Sinaloas akuzohet nga SHBA-ja si furnizuesi kryesor i fentanilit, drogë e cila vret 100.000 amerikanë çdo vit.

Zambada raportohet se ka mohuar akuzat në një gjykatë federale të SHBA-së dhe do të ketë seancën e tij të dytë më 31 korrik.