Ushtria izraelite ka lëshuar urdhra të reja evakuimi për palestinezët në zona të shumta të qytetit Rafah në Rripin e Gazës jugore, duke thelluar më tej krizën humanitare derisa vazhdojnë sulmet vdekjeprurëse ndaj enklavës, transmeton Anadolu.
Zëdhënësi i ushtrisë izraelite, Avichay Adraee, udhëzoi banorët e lagjeve Al-Shaëka, Al-Nasr, Al-Salam, Al-Manara dhe Qizan an-Najjar në qytetin Rafah që të evakuohen, duke përmendur pretendimet për vënien në shënjestër të “organizatave terroriste” në këto zona.
Urdhrat e evakuimit vijnë vetëm disa ditë pasi Izraeli përshkallëzoi operacionet ushtarake në Rafah, duke vendosur trupa shtesë dhe duke intensifikuar sulmet si pjesë e fushatës gjenocidale kundër popullsisë palestineze.
Para luftës gjenocidale të Izraelit në Gaza, që filloi në muajin tetor të vitit 2023, Rafah kishte një popullsi prej më shumë se 300 mijë banorësh.
Gjatë muajve të parë të luftës izraelite, popullsia në Rafah u rrit në më shumë se 1 milion palestinezë të zhvendosur që kërkuan strehim atje, vetëm për t’u zhvendosur përsëri me forcë pasi Izraeli filloi ofensivën tokësore në maj të vitit 2024.
Që nga tetori i vitit 2023, të paktën 50.350 palestinezë janë vrarë nga sulmet brutale izraelite në Gaza, kryesisht gra dhe fëmijë, si dhe mbi 114 mijë të tjerë janë plagosur.
Më 18 mars, ushtria izraelite nisi një fushatë të papritur të sulmeve ajrore në Rripin e Gazës dhe vetëm që atëherë ka vrarë të paktën 920 palestinezë, si dhe ka plagosur mbi 2 mijë të tjerë. Kjo fushatë e sulmeve ajrore erdhi pas marrëveshjes së armëpushimit dhe të shkëmbimit të të burgosurve të arritur në muajin janar.
Në muajin nëntor të vitit të kaluar, Gjykata Ndërkombëtare Penale lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit.
Izraeli për luftën brutale në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.
