Ministri i Jashtëm i Turqisë, Hakan Fidan, i ka bërë thirrje Izraelit të shmangë çdo përplasje në territorin sirian, pas disa sulmeve të përsëritura izraelite ndaj caqeve ushtarake në Siri që, sipas tij, po minojnë aftësinë e qeverisë së re siriane për të parandaluar kërcënimet.
Në një intervistë dhënë për agjencinë Reuters, gjatë një takimi të ministrave të Jashtëm të NATO-s në Bruksel, Fidan deklaroi se veprimet e Izraelit në Siri po kontribuojnë në krijimin e një klime të paqëndrueshme në rajon. Ai shtoi se administrata e re në Damask, e udhëhequr nga presidenti Ahmed al-Sharaa, është një aleat i ngushtë i Turqisë.
“Nëse administrata e re në Siri dëshiron të arrijë ‘marrëveshje të caktuara’ me Izraelin – i cili, sikurse Turqia, është një fqinj i Sirisë – atëherë kjo është çështje e tyre e brendshme,” tha Fidan.
Turqia, si një anëtare e NATO-s, ka mbajtur një qëndrim të ashpër ndaj veprimeve të Izraelit në Rripin e Gazës që nga viti 2023, duke i quajtur ato një gjenocid kundër popullit palestinez. Përveç kritikave publike, Ankaraja ka paraqitur një kërkesë për t’u bashkuar në një rast në Gjykatën Penale Ndërkombëtare (GJPN) kundër Izraelit dhe ka ndërprerë të gjitha marrëdhëniet tregtare me të.
Deklaratat e fundit të ministrit Fidan theksojnë pozicionin e Turqisë si një faktor diplomatik rajonal që kërkon të shmangë përshkallëzimin e mëtejshëm të konfliktit në Lindjen e Mesme, ndërkohë që ruan aleancat e saj strategjike dhe ndikimin në Siri. /mesazhi
