Turqia ka arrestuar të mërkurën nëntë persona, përfshirë pronarin e hotelit, në lidhje me një zjarr vdekjeprurës që mori jetën e 76 personave dhe la të lënduar dhjetëra të tjerë, në një vendpushim skish në Turqinë perëndimore, ka bërë të ditur të mërkurën ministri i Brendshëm, Ali Yerlikaya.
Yerlikaya ka thënë gjithashtu se trupat e 45 viktimave u janë dorëzuar familjeve të tyre, ndërsa testet e ADN-së janë duke u kryer për të identifikuar trupat e mbetur në institutin e mjekësisë ligjore.
Zjarri ka rënë në hotelin Grand Kartal në vendpushimin e skive Kartalkaya në malet Bolu.
Hoteli ku shpërtheu zjarri ka shprehur dhimbjen e thellë në një deklaratë të mërkurën dhe u zotua për bashkëpunim të plotë me hetimin.
“Ne po bashkëpunojmë me autoritetet për të hedhur dritë mbi të gjitha aspektet e këtij incidenti”, thuhet në deklaratë.
Hoteli 12-katësh, i cili kishte 238 mysafirë të regjistruar, u përfshi nga flakët pasi zjarri filloi në katin e restorantit rreth orës 3:30 të mëngjesit të së martës. Të mbijetuarit përshkruan skena paniku teksa iknin nëpër korridoret e mbushura me tym dhe u hodhën nga dritaret për të shpëtuar.
Autoritetet po përballen me kritika në rritje për masat e sigurisë së hoteleve, pasi të mbijetuarit raportuan se asnjë alarm zjarri nuk u ndez gjatë incidentit.
