Kompania ajrore “Turkish Airlines” ka rifilluar shërbimet për në Siri me një fluturim Istanbul-Damask pas një ndërprerjeje të operacioneve në vitin 2012, për shkak të luftës civile në vend, raporton Anadolu.
Shumë sirianë shprehën gëzimin për kthimin në atdheun e tyre pas vitesh mërgimi. Disa u panë duke mbajtur flamuj nga revolucioni sirian i dhjetorit, në të cilin regjimi i Bashar Asadit u rrëzua shpejt.
Gati 350 pasagjerë hipën në fluturimin për në Aeroportin Ndërkombëtar të Damaskut pasi bënë kontrolle të biletave dhe pasaportave.
Pasagjerja Fatma Zehra u tha gazetarëve se kishte ardhur në Türkiye kur ishte vetëm 2 vjeçe dhe ishte shumë e emocionuar që do të kthehej së bashku me familjen në atdheun e saj ku lindi.
Tani 14 vjeçe, Zehra tha: “Nuk e kam parë kurrë vendin tim. Jam shumë e emocionuar që po e shoh për herë të parë. Do të shkojmë nga Damasku në Halep. Do ta shoh gjyshen time atje”.
Rreth 4 milionë sirianë u strehuan në Türkiyen fqinje gjatë luftës, më shumë se çdo vend tjetër.
Ahmet Kiraz, një pasagjer tjetër, tha se ai erdhi në Türkiye në vitin 2012, ndërtoi një jetë duke studiuar dhe punuar dhe nuk priste kurrë të kthehej në Siri.
“Mendonim se nuk do të ktheheshim më kurrë”, tha ai.
“Por kur erdhi rasti, ne ishim shumë të lumtur. Unë po kthehem në vendin tim me fluturimin e parë. Më duket si një ëndërr”, shtoi Kiraz.
Avioni i Turkish Airlines, i cili u nis nga Aeroporti i Istanbulit në orën 9:00 sipas kohës lokale, pritet të ulet në Aeroportin Ndërkombëtar të Damaskut pas një fluturimi të shkurtër prej dy orësh.
