Presidenti amerikan Donald Trump solli ndryshime të mëdha për SHBA-në që në ditën e parë të tij në Shtëpinë e Bardhë, raporton Anadolu.
Përveç që revokoi rreth 80 urdhra ekzekutiv të administratës së mëparshme, Trump gjithashtu erdhi me urdhra të rinj sfidues.
– Anulohen sanksionet ndaj kolonëve të dhunshëm izraelitë
Ndër anulimet, vlen të theksohet se Trump vendosi të anulojë një urdhër ekzekutiv të administratës Biden sipas të cilit u vendosën sanksione ndaj kolonëve të dhunshëm izraelitë në Bregun Perëndimor të pushtuar.
Kjo ishte një nga 78 urdhrat ekzekutivë të anuluar nga Trump menjëherë pasi ai hyri në Zyrën Ovale.
Urdhri ekzekutiv 14115 i titulluar “Vendosja e sanksioneve të caktuara ndaj personave që minojnë paqen, sigurinë dhe stabilitetin në Bregun Perëndimor” sanksiononte kolonët e paligjshëm izraelitë të cilët kryen “nivele të larta të dhunës së kolonëve ekstremistë, zhvendosje të detyruar të njerëzve dhe shkatërrim të pronës dhe fshatrave”.
– SHBA tërhiqet nga OBSH dhe Marrëveshja e Parisit për klimën
Presidenti Donald Trump nënshkroi një urdhër ekzekutiv për tërheqjen e SHBA-së nga Organizata Botërore e Shëndetësisë (OBSH).
“OBSH na shkatërroi. Të gjithë shkatërrojnë Shtetet e Bashkuara dhe kjo mbaroi. Kjo nuk do të ndodhë më”, u tha Trump gazetarëve teksa nënshkroi urdhrat ekzekutivë pasi u kthye në Zyrën Ovale.
Trump edhe më herët kishte paralajmëruar një ndryshim të madh në qeverinë amerikane që pritet gjerësisht të dërgojë valë tronditëse në shoqërinë amerikane dhe botën.
Trump tha se SHBA i ka paguar 500 milionë dollarë agjencisë së OKB-së.
“Më dukej pak e padrejtë. Kina paguan 39 milionë dollarë, ne paguajmë 500 milionë dollarë dhe Kina është një vend më i madh”, tha ai.
Trump nënshkroi një tjetër urdhër ekzekutiv për tërheqjen e SHBA-së nga Marrëveshja e Parisit për klimën. Ai gjithashtu nënshkroi një letër që do t’i dërgohet OKB-së duke shpjeguar tërheqjen nga traktati.
Trump edhe në mandatin e parë tërhoqi SHBA-në nga marrëveshja për klimën. Ish-presidenti Joe Biden iu rikthye marrëveshjes në ditën e tij të parë në detyrë.
– Shpallet emergjencë kombëtare në kufirin jugor amerikan
Presidenti Donald Trump nënshkroi një urdhër ekzekutiv duke shpallur një emergjencë kombëtare në kufirin jugor të SHBA-së, që hap rrugën për të vendosur trupat amerikane atje. Masa synon gjithashtu të godasë imigracion.
“Të gjitha hyrjet e paligjshme do të ndalen menjëherë dhe ne do të fillojmë procesin e kthimit të miliona e miliona të huajve kriminelë në vendet nga kanë ardhur”, tha presidenti, një premtim që ai përsëriti gjatë fushatës së tij.
Ndër urdhrat tjerë ekzekutivë të nënshkruar nga Trump, është përfundimi i nënshtetësisë së të drejtës së lindjes dhe përkufizimi i kësaj të drejte sipas Kushtetutës amerikane.
– Falje për të përfshirët në sulmin në Kapitol
Në një urdhër tjetër ekzekutiv, Donald Trump nënshkroi faljen e të pandehurve për sulmin e 6 janarit 2021 në Kapitol.
“Mendoj se ky urdhër do të zbatohet për rreth 1.500 persona”, tha Trump në Zyrën Ovale.
