Tre palestinezë u plagosën nga një granatë e hedhur nga një dron izraelit të hënën në lindje të Rafah në Rripin jugor të Gazës, tha një burim mjekësor.
Sulmi ndodhi teksa tre palestinezët po inspektonin shtëpitë e tyre pranë zonës tampon në lindje të qytetit Rafah, tha burimi për Anadolu.
Sipas dëshmitarëve, forcat e ushtrisë izraelite janë të stacionuara në zonat kufitare lindore të Rafahut, duke i penguar palestinezët t’i afrohen zonës sipas fazës së parë të marrëveshjes së armëpushimit të Gazës dhe shkëmbimit të të burgosurve.
Të dielën, palestinezët e zhvendosur rihynë në qytetin Rafah në Gazën jugore për herë të parë që nga fillimi i ofensivës tokësore izraelite më 6 maj 2024.
Marrëveshja e armëpushimit dhe shkëmbimit të të burgosurve midis Izraelit dhe Hamasit hyri në fuqi të dielën, duke pezulluar luftën gjenocidale të Izraelit në Rripin e Gazës.
Marrëveshja trefazore përfshin një shkëmbim të të burgosurve dhe qetësi të qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Gati 47.000 palestinezë janë vrarë, kryesisht gra dhe fëmijë, dhe mbi 110.700 të tjerë janë plagosur në luftën gjenocidale të Izraelit në Gaza, sipas autoriteteve lokale shëndetësore.
Lufta izraelite ka lënë më shumë se 11.000 njerëz të zhdukur, me shkatërrim të gjerë dhe një krizë humanitare që ka marrë jetën e shumë të moshuarve dhe fëmijëve në një nga fatkeqësitë më të këqija humanitare globale.
Në nëntor 2024, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një lëndë gjenocidi në Gjykatën Ndërkombëtare të Drejtësisë për luftën e tij në enklavë.
