Presidenti Hashim Thaçi ka thënë se, si çdo 30 dhjetor tjetër, edhe sot kujtohen veteranët e luftës çlirimtare që janë shembull i sakrifikimit për idealet dhe lirinë.
Ai përmes një postimi në Facebook e ka kujtuar edhe betejën e parë të familjes Jashari në Prekaz.
Postimi i plotë i Hashim Thaçit:
Në këtë 30 dhjetor, si në çdo fundvit tjetër, i nderojmë ata që bënë të mundur ta gëzojmë lirinë dhe pavarësinë tonë, veteranët e luftës sonë çlirimtare.
Kjo ditë sjell në kujtesën tonë edhe betejën e parë të familjes së komandantit legjendar Adem Jashari në Prekaz, më 30 dhjetor 1991, aty ku nisi rruga e lirisë.
Veteranët e luftës së Ushtrisë Çlirimtare të Kosovës, dëshmorët dhe heronjtë e saj, janë shembull i sakrifikimit për ideale dhe për lirinë e popullit tonë.
Urime Dita e Veteranit, të gjithë veteranëve të Ushtrisë Çlirimtare të Kosovës!
Sot në Kosovë shënohet Dita e Veteranit përmes së cilës përkujtohet sakrifica, angazhimi dhe kontributi i veteranëve për lirinë dhe Pavarësinë e Kosovës.
Më 30 dhjetor 1991 filloi përballja e familjes Jashari me forcat ushtarake serbe në Prekaz, ku nga kjo filloi edhe rezistenca ushtarake e UÇK-së.
