Tetë bujq palestinezë u vranë në një sulm ajror izraelit në qytetin jugor të Gazës, Khan Younis, transmeton Anadolu.
Një burim mjekësor tha se trupat e viktimave janë transferuar në Spitalin Evropian pas sulmit që synoi lagjen Al-Salam në pjesën juglindore të Khan Younisit.
Dëshmitarët thanë se sulmi ndodhi teksa bujqit po kujdeseshin për tokën bujqësore, duke i vrarë ata menjëherë.
Të dielën, kryeministri izraelit Benjamin Netanyahu u zotua të përshkallëzojë sulmet në Gaza mes përpjekjeve për të zbatuar planin e presidentit të SHBA-së, Donald Trump për të zhvendosur palestinezët nga enklava.
Izraeli filloi një ofensivë të papritur ajrore në Gaza më 18 mars, dhe që atëherë ka vrarë më shumë se 1.000 viktima dhe ka plagosur mbi 2.500, duke prishur armëpushimin e janarit dhe marrëveshjen e shkëmbimit të të burgosurve midis Izraelit dhe grupit të rezistencës palestineze Hamas.
Më shumë se 50.400 palestinezë janë vrarë në Gaza në sulmet ushtarake të Izraelit që nga tetori 2023, shumica prej tyre gra dhe fëmijë.
Gjykata Ndërkombëtare Penale lëshoi urdhra arresti nëntorin e kaluar për Netanyahun dhe ish-ministrin e tij të Mbrojtjes Yoav Gallant, për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavën palestineze.
