Sulmet ajrore izraelite në Rripin e Gazës kanë vrarë të paktën 80 palestinezë të tjerë, duke e çuar numrin e përgjithshëm të tyre që nga tetori i vitit 2023 në të paktën 50.357, transmeton Anadolu.
Ministria e Shëndetësisë me bazë në Gaza njoftoi se 53 viktima u sollën në spitalet e Gazës gjatë ditës së djeshme, përkatësisht në ditën e parë të festës së Fitër Bajramit.
Ministria tha se 305 persona të tjerë të plagosur u transferuan në spitale brenda 48 orëve të fundit, duke e çuar numrin e përgjithshëm të palestinezëve të plagosur në të paktën 114.400.
“Shumë viktima akoma janë të bllokuar nën rrënoja dhe në rrugë pasi shpëtimtarët nuk mund t’i arrijnë ato”, theksoi ministria palestineze.
Më 18 mars, ushtria izraelite nisi një fushatë të papritur të sulmeve ajrore në Rripin e Gazës, duke vrarë mbi 1 mijë palestinezë, pavarësisht marrëveshjes së armëpushimit dhe të shkëmbimit të të burgosurve që u arrit në muajin janar.
Nëntorin e vitit të kaluar, Gjykata Penale Ndërkombëtare lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzit në Gaza.
Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.
