Që nga viti 2015, Burkina Faso është përfshirë nga konflikti që ka marrë më shumë se 2000 jetë.
Të paktën 50 persona kanë vdekur në një sulm nga njerëz të armatosur në një fshat në veri të Burkina Fasos, tha një zëdhënës i qeverisë.
Sulmuesit goditën gjatë natës midis së shtunës dhe të dielës në komunën Seytenga, pjesë e provincës Seno, e cila shtrihet në tokat kufitare ku luftëtarët e lidhur me al-Kaiden dhe ISIL (ISIS) janë përfshirë në kryengritje të armatosur.
“Ushtria ka gjetur deri më tani 50 trupa” pasi fshati Seytenga u sulmua gjatë natës të së shtunës, tha zëdhënësi Lionel Bilgo të hënën, duke shtuar se numri i të vdekurve “mund të rritet”.
Kishte deklarime të ndryshme për numrin e të vdekurve. Një zyrtar i sigurisë i tha agjencisë së lajmeve Reuters të hënën se të paktën 100 njerëz kishin vdekur, ndërsa një burim lokal që nuk donte të përmendej i tha agjencisë se rreth 165 njerëz ishin vrarë.
Kombet e Bashkuara dënuan sulmin, për të cilin tha se “kishte marrë shumë viktima” dhe u bëri thirrje autoriteteve që t’i nxjerrin autorët para drejtësisë.
Bashkimi Evropian gjithashtu dënoi incidentin, duke bërë thirrje që “të hidhet dritë mbi rrethanat e kësaj vrasjeje”.
“Metoda e përdorur nga grupi terrorist që kreu sulmin, përkatësisht ekzekutimi sistematik i kujtdo që ata takonin në fshat, është e tmerrshme”, tha në një deklaratë të hënën shefi i politikës së jashtme të BE-së, Josep Borrell.
Seytenga ishte vendi i luftimeve të përgjakshme javën e kaluar midis rebelëve dhe forcave qeveritare.
Njëmbëdhjetë policë u vranë të enjten, duke nxitur një operacion ushtarak që ushtria tha se çoi në vdekjen e rreth 40 luftëtarëve rebelë.
“Gjakderdhja u shkaktua nga hakmarrjet ndaj veprimeve të ushtrisë,” tha zëdhënësi i qeverisë Bilgo.
“Vendi është goditur, por ushtria po bën punën e saj.”
Organizatat humanitare në rajon thanë se rreth 3,000 njerëz po strehoheshin në qytetet fqinje pasi u larguan nga fshati.
Sulmi është një nga më të përgjakshmet që nga grusht shteti ushtarak në janar, kur kolonelët e ushtrisë kombëtare – të zemëruar me dështimin e zyrtarëve për të mposhtur grupet e armatosura – rrëzuan presidentin e zgjedhur të vendit, Roch Marc Christian Kabore.
Lideri i ri i vendit, nënkoloneli Paul-Henri Sandaogo Damiba, u zotua menjëherë se do ta bënte sigurinë prioritetin e tij kryesor.
Pas një qetësie relative në luftimet pas grushtit të shtetit, sulmet kanë rifilluar, me qindra viktima civile dhe ushtarake gjatë tre muajve të fundit. Sulmet janë përqendruar në veri dhe lindje të vendit.
Shteti Sahel pa dalje në det është nën kontrollin e një kryengritjeje të armatosur shtatëvjeçare që ka marrë më shumë se 2000 jetë dhe ka detyruar rreth 1.9 milionë njerëz të largohen nga shtëpitë e tyre në Burkina Faso që nga viti 2015. /mesazhi
