Tetë persona, të gjithë fëmijë, janë vrarë në një sulm izraelit të papritur në qytetin Khan Younis mbrëmjen e së dielës, sipas dëshmive nga vendi i ngjarjes.
Mohammad Al Naffar, një i mbijetuar i sulmit, foli nga një ambulancë, duke rrëfyer momentet e tmerrit që përjetoi. Sulmi ndodhi rreth orës 22:00 me orën lokale, pa asnjë paralajmërim.
“Dëgjuam shpërthime dhe çdo gjë po fluturonte përreth. Zbritëm për të parë çfarë kishte ndodhur dhe kuptuam se kishin goditur shtëpinë e xhaxhait tim, Abu Mussad Al Naffar,” tha ai.
“U përpoqëm të ndihmonim të plagosurit, të shihnim kush ishte ende gjallë… dhe u tronditëm kur pamë se të gjithë të vrarët ishin fëmijë. Shumë pak kishin mbijetuar me plagë. Të gjithë ishin fëmijë. Ja, kjo është kushërira ime. Zoti e mëshiroftë. Ajo ishte një fëmijë. Të gjithë ata që po i godasin janë fëmijë. Nuk kanë lidhje me rezistencën apo luftimet. Nuk pati asnjë paralajmërim.”
Sulmi i fundit vjen në një kontekst të përshkallëzuar të ofensivës izraelite në Gaza, ku mijëra civilë kanë humbur jetën që nga tetori 2023.
Organizatat ndërkombëtare kanë shprehur shqetësim të thellë për numrin në rritje të viktimave civile, veçanërisht fëmijë.
Khan Younis, si pjesa më e goditur e jugut të Gazës, vazhdon të përjetojë sulme të vazhdueshme, ndërsa banorët kërkojnë ndihmë dhe mbrojtje ndërkombëtare. /mesazhi
