Sulmet ndaj agjencisë së OKB-së për refugjatët palestinezë (UNRWA) janë pjesë e përpjekjes 75-vjeçare të Izraelit për të fshirë palestinezët nga historia, në kuadër të kontekstit më të gjerë të gjenocidit në Gaza, tha ish-zyrtari i UNRWA-së.
Lex Takkenberg, i cili mbajti poste të ndryshme të larta në UNRWA për 31 vjet, foli për Anadolu për sulmet e vazhdueshme të Izraelit ndaj agjencisë, kufizimet gjatë mandatit të tij dhe presionet në rritje kohët e fundit.
Takkenberg, bashkautor i librit “Refugjatët palestinezë në të drejtën ndërkombëtare” me Raportuesen Speciale të OKB-së për Palestinën, Francesca Albanese, deklaroi se shënjestrimi i UNRWA-së nga Izraeli është pjesë e një plani për të “fshirë” praninë fizike të popullit palestinez, institucioneve të tyre, sistemit arsimor dhe historisë.
– Marrëdhëniet e trazuara të Izraelit me UNRWA-në
Takkenberg, një avokat ndërkombëtar, vuri në dukje se marrëdhënia e Izraelit me UNRWA-në ka qenë problematike që nga viti 1967.
“Është zbuluar shumë shpejt se Izraeli ka pasur gjithmonë një lloj marrëdhënie urrejtje-dashurie me OKB-në. Dhe në këtë, natyrisht, përfshihej edhe UNRWA”, tha Takkenberg, duke shtuar:
“Një nga gjërat e para për të cilat Izraeli u ofendua ishin tekstet shkollore të përdorura nga UNRWA në shkollat e saj, të cilat ishin tekste nga Egjipti dhe Jordania, që përmbanin elemente që Izraeli i konsideronte antisemitike”.
Izraeli më pas filloi të sulmojë agjencinë e OKB-së për refugjatët palestinezë dhe filloi të censurojë tekstet shkollore, duke krijuar një “dramë” rreth kësaj, duke përfshirë edhe UNESCO-n, shtoi Takkenberg.
65-vjeçari tha se Izraeli kishte pretenduar se stafi i UNRWA-së në Gaza dhe Bregu Perëndimor ishte i përfshirë në “aktivitete terroriste”.
“UNRWA gjithmonë ka thënë, ok, na jep provat dhe ne do të marrim masa të menjëhershme”, tha ai, duke shtuar se kjo ka ndodhur në mënyrë të përsëritur, që Izraeli të bëjë akuza por kurrë nuk dha prova të qëndrueshme.
“Kjo ka vazhduar edhe në lidhje me sulmet më të fundit nën hetimet e hapura dhe madje, në interes të agjencisë, në pjesën më të madhe të rasteve janë suspenduar anëtarët e stafit në fjalë”, shtoi ai.
Takkenberg vuri në dukje se sulmet e Izraelit ndaj UNRWA-së u përshkallëzuan me ardhjen e qeverisë së re dhe pas sulmit të Hamasit më 7 tetor 2023.
Pikërisht në ditën që Gjykata Ndërkombëtare e Drejtësisë (GJND) nxori vendimin e saj të parë të përkohshëm në rastin e gjenocidit, Izraeli ngriti pretendimin se disa anëtarë të stafit të UNRWA-së ishin të përfshirë në sulmin e Hamasit tetorin e kaluar, përkujton ai.
Duke theksuar rëndësinë e agjencisë së OKB-së, e cila ka 30 mijë punonjës në rajon, Takkenberg tha se ajo është një ofrues i madh i shërbimeve publike që ofron arsim, kujdes shëndetësor, shërbime sociale, mikrofinancë dhe mbështetje për strehim.
“Sa herë që ka ripërtëritje të konfliktit në rajon, UNRWA bëhet gjithashtu litar shpëtimi, duke ofruar mbështetje emergjente. Në Gaza, UNRWA është ende shtylla kurrizore e të gjithë sistemit humanitar, duke u përpjekur të ndihmojë të mbijetuarit e gjenocidit, tekstualisht, të mbijetojnë”, theksoi ai.
– Simboli i të drejtës së palestinezëve për t’u kthyer
Duke theksuar rëndësinë simbolike të UNRWA-s për popullin palestinez, Takkenberg tha se dymbëdhjetë muaj përpara krijimit të agjencisë, Asambleja e Përgjithshme e OKB-së kishte vendosur që çështja e refugjatëve palestinezë duhet të zgjidhej kryesisht përmes të drejtës së kthimit dhe kishte miratuar Rezolutën 194 në vitin 1948.
Ai shpjegoi se kjo rezolutë parashikonte lejimin e refugjatëve palestinezë të kthehen në shtëpitë e tyre.
Duke vepruar kështu, bashkësia ndërkombëtare dhe Asambleja e Përgjithshme afirmuan të drejtën e kthimit, e cila buronte nga paligjshmëria e spastrimit etnik dhe dëbimi me forcë i refugjatëve në Palestinë, shtoi ai.
– Bllokimi i UNRWA-së është shkelje e ligjit ndërkombëtar
Eksperti holandez thekson se Izraeli po shkel Konventën e Gjenocidit dhe vendimet e përkohshme të GJND-së, duke i pamundësuar operacionet e UNRWA-së.
Izraeli po shkel gjithashtu opinionin këshillues të GJND-së që e shpalli pushtimin të paligjshëm dhe urdhëroi Izraelin të tërhiqej nga Bregu Perëndimor, Kudsi Lindor dhe i gjithë Rripi i Gazës, shtoi ai.
Duke vënë në dukje se UNRWA i ka kërkuar Asamblesë së Përgjithshme të OKB-së dhe Këshillit të Sigurimit që të mbrojnë mandatin, stafin dhe operacionet e organizatës përballë sulmeve izraelite, Takkenberg nënvizoi se Izraeli po synon jo vetëm UNRWA-n, por të gjitha institucionet e OKB-së.
Izraeli ka vazhduar një ofensivë shkatërruese në Gaza që nga sulmi i Hamasit më tetor 2023, pavarësisht një rezolute të Këshillit të Sigurimit të OKB-së që kërkon një armëpushim të menjëhershëm.
Rreth 43.700 njerëz janë vrarë që atëherë në Gaza, kryesisht gra dhe fëmijë, dhe mbi 103 mijë të tjerë janë plagosur, sipas autoriteteve shëndetësore palestineze.
Izraeli gjithashtu përballet me padi për gjenocid në GJND për luftën e tij vdekjeprurëse në Gaza.
