Zyra e Mediave e Qeverisë së Gazës ka publikuar një deklaratë të re mbi valën e fundit të sulmeve vdekjeprurëse të Izraelit në Gaza, duke raportuar se shumica e viktimave janë gra, fëmijë dhe të moshuar, me disa “familje të tëra të fshira”.
“Këto masakra brutale të kryera nga ushtria izraelite riafirmojnë se ky pushtim e kupton vetëm gjuhën e vrasjes, shkatërrimit dhe gjenocidit,” tha zyra e mediave.
Sulmet vijnë ndërsa Izraeli vazhdon gjithashtu bllokadën e enklavës për javën e tretë, një veprim që zyra e mediave e përshkroi si një “taktikë lufte për të thyer vullnetin e popullit tonë palestinez”.
Megjithatë, populli i Gazës “nuk do të frikësohet nga këto krime dhe do të vazhdojë qëndresën dhe luftën e tij legjitime derisa pushtimi izraelit të hiqet nga toka jonë”, thuhet në deklaratë.
Zyra e mediave u bëri thirrje komunitetit ndërkombëtar, përfshirë OKB-në, grupet e të drejtave të njeriut dhe organizatat e ndihmës, të ndërmarrin veprime të menjëhershme për të kundërshtuar “krimet” e Izraelit dhe për të mbajtur udhëheqësit izraelitë përgjegjës. “Bota nuk mund të vazhdojë të qëndrojë duarkryq,” përfundoi deklarata. /mesazhi
