Një student palestinez në Universitetin Columbia u arrestua nga Agjencia e Imigracionit dhe Doganave e SHBA-së (ICE) të hënën ndërsa po përpiqej të përfundonte një intervistë për shtetësinë në Vermont, raportoi media amerikane, transmeton Anadolu.
Mohsen K. Mahdawi, një banor i përhershëm ligjor dhe ish-udhëheqës i lëvizjes protestuese, u arrestua në zyrën e Shërbimeve të Shtetësisë dhe Imigracionit të SHBA-së (USCIS) në Colchester, Vermont, raportoi “The Intercept”.
“Ai erdhi në këtë vend duke shpresuar të jetë i lirë të flasë për mizoritë që ka parë, vetëm për t’u ndëshkuar për një fjalim të tillë”, ka thënë avokatja Luna Droubi për Intercept, duke e përshkruar ndalimin e tij si të paligjshëm dhe të shkaktuar nga identiteti i tij palestinez.
Avokatët e tij paraqitën një peticion “habeas corpus”, duke pretenduar se qeveria amerikane po shkel të drejtat e tij të procesit të rregullt ligjor duke e vënë në shënjestër për pikëpamjet e tij politike.
Dokumenti sugjeronte se ai mund të dëbohej sipas një dispozite të përdorur rrallë, Akti i Imigrimit dhe Kombësisë së epokës së Luftës së Ftohtë, i cili lejon imigrantët të konsiderohen si kërcënime për politikën e jashtme amerikane dhe është përdorur nga Sekretari i Shtetit Marco Rubio në raste të tjera të fundit, përfshirë kundër aktivistit palestinez Mahmoud Khalil.
Mahdawi beson se dëbimi do të rrezikonte jetën e tij, duke përmendur vdekjen e anëtarëve të familjes dhe shkatërrimin e shtëpive të tyre në Bregun Perëndimor të pushtuar. “Është një lloj dënimi me vdekje”, citohet të ketë thënë ai nga Intercept.
Mahdawi, i cili ka mbrojtur dialogun paqësor midis studentëve hebrenj dhe palestinezë, e kishte zvogëluar aktivizmin e tij në vitin 2024. Pavarësisht kësaj, ai u bë objekt i një shqyrtimi intensiv nga grupet proizraelite si “Canary Mission” dhe “Betar”, të cilët kanë përpiluar dosje publike që e akuzojnë atë dhe të tjerët për antimitizëm.
Senatori i Vermontit, Bernie Sanders, kritikoi ndalimin e Mahdawit, duke thënë se atij “duhet t’i ofrohet një proces i duhur sipas ligjit dhe të lirohet menjëherë nga paraburgimi”.
Ai shtoi se individët që e ndaluan atë “refuzuan të japin ndonjë informacion se ku po e çonin apo çfarë do të ndodhte me të. Kjo është e pamoralshme, çnjerëzore dhe e paligjshme”.
Ai tani është studenti i nëntë i Universitetit Columbia që përballet me deportim si pjesë e një fushate më të madhe për të larguar studentët ndërkombëtarë të përfshirë në lëvizjet e solidaritetit me Palestinën.
Zhvillimi vjen në mes të një morie veprimesh ekzekutive të presidentit Donald Trump që synonin deportimin e shtetasve të huaj që janë konsideruar se kanë pasur “qëndrime armiqësore” ndaj SHBA-së, duke përfshirë një goditje ndaj asaj që ai e ka quajtur antisemitizëm, që ka rezultuar në dëbimin e studentëve të huaj që kanë marrë pjesë në protestat propalestineze në kampuse.
Një gjykatëse e imigracionit në SHBA vendosi të premten se Mahmoud Khalil, një aktivist propalestinez i Universitetit Columbia dhe banor i përhershëm ligjor, i cili u arrestua nga oficerët e ICE-së më 8 mars në banesën e tij në kampus në New York, mund të dëbohet sipas një ligji federal që përdoret rrallë, duke cituar shqetësime të politikës së jashtme.
