Këshilli NATO-Rusi mund të takohet në janar për herë të parë në dy vjet e gjysmë, megjithëse Moska ende nuk është përkushtuar.
Një zyrtar i NATO-s konfirmoi se Sekretari i Përgjithshëm Jens Stoltenberg kishte vendosur të thërriste një takim forumi më 12 janar dhe se aleanca ishte në kontakt me Rusinë për këtë çështje.
Ministria e Jashtme ruse konfirmoi se kishte marrë propozimin, por tha se ”është ende në shqyrtim, me formatin dhe kohën”.
“Por ne jemi të hapur për dialog”, theksoi zëdhënësja Maria Zakharova, sipas agjencisë ruse të lajmeve TASS.
Për javë të tëra, një akumulim i trupave ruse pranë kufirit ukrainas ka shkaktuar shqetësim në komunitetin ndërkombëtar. Rusia ka kërkuar “garanci sigurie” nga Perëndimi, të cilat përfshijnë një garanci kategorike nga NATO se Ukraina nuk do të bashkohet me aleancën ushtarake.
NATO e refuzon kërkesën, por Stoltenberg ka theksuar vazhdimisht gatishmërinë e tij për të diskutuar çështjet në Këshillin NATO-Rusi.
Bisedimet e fundit në këtë format u zhvilluan në korrik 2019 dhe që atëherë të gjitha përpjekjet për të caktuar një datë për një takim kanë dështuar. /atsh
