Spitalet në Rripin e Gazës po përballen me një krizë të rëndë teksa përballojnë fluksin e madh të të plagosurve pas sulmit shkatërrues në Shujajë. Gazetarja Hind Khoudary raporton se ekipet e shpëtimit po përpiqen të nxjerrin njerëzit nga rrënojat me duar, ndërsa terreni i shkatërruar po e bën të pamundur ndërhyrjen e shpejtë.
Punonjësit e emergjencës përballen me mungesë të theksuar të karburantit dhe mjeteve mjekësore. Spitali Arab Al-Ahli ka bërë thirrje urgjente për njësi gjaku, pasi dhjetëra të plagosur janë dërguar atje.
Një mjek nga ky spital tha se shumica e pacientëve kanë mbërritur me djegie të rënda dhe spitali nuk ka as ilaçe për trajtimin e tyre.
Për më shumë se një muaj, asnjë kamion me ilaçe apo materiale mjekësore nuk ka hyrë në Gaza, ndërkohë që çdo ditë spitalet pranojnë dhjetëra të plagosur. Ato janë tejmbushur dhe stafi mjekësor është i rraskapitur, por vazhdojnë të bëjnë maksimumin për të shpëtuar jetët e civilëve.
Situata është përkeqësuar ndjeshëm, ndërsa komuniteti ndërkombëtar vijon të apelojë për ndihmë humanitare urgjente. /mesazhi
