Spanja ka shënuar fitore ndaj Kosta Rikës me rezultat 7-0 në ndeshjen e parë në kuadër të grupit E të Kupës së Botës.
Ndeshja nisi shumë mirë për ‘Furinë e Kuq’ që arriti të krijojë disa raste që në minutat e para, ku Dani Olmo dhe Marcos Asensio rrezikuan.
Ndeshjen e hapi Olmo që shënoi në minutën e 11-të për 1-0, duke e mposhtur Keylor Navasin.
Pas dhjetë minutash lojë ishte radha e Marcos Asensios, që shënoi për 2-0 pas asistimit të Jordi Alba.
Në minutën e 30-të, Spanja fitoi penallti, ku Ferran Torres ishte i saktë nga pika e bardhë për 3-0.
Me të filluar pjesa e dytë, Spanja sërish shënoi me Torres për 4-0, duke e treguar superioritetin ndaj kundërshtarit.
Alvaro Morata që u fut në lojë në pjesën e dytë, asistoi te Gavi që shënoi për 5-0.
Në minutën e 90-të ishte radha e Carlos Soler për të shënuar për 6-0.
Krejt në fund shënoi edhe Alvaro Morata për 7-0, duke bërë me dije që Spanja do të jetë arrë e fortë për të gjithë kandidatët e tjerë për trofeun e Kupës së Botës.
Spanja dhe Japonia kanë nga tri pikë, ndërsa Gjermania dhe Kosta Rika janë pa pikë.
