Përpara nisjes për në Francë, gazeta italiane Gazzetta dello Sport kishte bërë një analizë për Shqipërinë dhe në atë kohë skuadra e drejtuar nga Gianni de Biasi vlente 44.2 milionë euro në total.
Aktualisht, lojtarët që me shumë mundësi do të grumbullohen nga trajneri Christian Panucci, vlejnë më shumë se 60 milionë euro.
Vlera e lojtarëve të Kombëtares gjatë kohës së De Biasit (Panorama)
Ndoshta kjo është skuadra më e shtrenjtë e të gjithë historisë së Kuqezinjve, por nëse lojtarët vazhdojnë të shkëlqejnë, sigurisht që do të rrisin vlerat e tyre në treg.
Tre portierët e Kombëtares shqiptare kanë rritje në vlerën e tyre në treg. Etrit Berisha, Tomas Strakosha dhe Alban Hoxha kanë ndikuar në rritjen e përgjithshme të kuqezinjve. I pari vjen pas një sezoni të shkëlqyer me skuadrën e Atalantas duke qenë vendimtar në kualifikimin për në Ligën e Evropës.
Strakosha ndërkohë blindoi vendin e titullarit te Lazio duke nxjerrë jashtë loje Federico Marchettin, por edhe Alban Hoxha ka bindur me performancat e tij.
Nuk mund të mungonte në këtë listë mbrojtësi Elseid Hysaj, i cili vazhdon të rrisë vlerën e tij nga 14 milionë euro në 18 milionë euro.
Vlera aktuale e lojtarëve të Kombëtares (Panorama)
Rritje të çmimit ka edhe në fazën e sulmit. Lojtarët si Latifi, Llullaku, Roshi, Cikalleshi e Sadiku, duket se kanë rënë në syrin e specialistëve.
Lojtarët që kanë luajtur pak, por edhe ata që kanë pasur probleme kanë pësuar rënie të vlerës së kartonit të tyre.
Diçka e tillë ka ndodhur kryesisht me lojtarët e mbrojtjes si Ajeti, Gjimshiti, Aliji, por edhe mesfushorët Kaçe, Basha, Lila dhe Memushaj.
Pavarësisht këtij fakti, rënia e vlerës së kartonit të tyre nuk ka ndikuar për të prishur trendin në rritje të të gjithë Kombëtares Shqiptare./Mesazhi/
