Rosalia Bollen, një specialiste e komunikimit nga UNICEF, ka paralajmëruar se urdhrat e zhvendosjes nga Izraeli po rëndojnë edhe më shumë vuajtjet e familjeve palestineze në Gaza.
Sipas saj, para nisjes së dy ofensivave tokësore – njëra në Tal as-Sultan në Rafah dhe tjetra në Beit Hanoon në veri të Gazës – rreth 125,000 njerëz ishin tashmë të zhvendosur për shkak të dhunës dhe urdhrave të mëparshëm të evakuimit.
Bollen tha se njerëzit janë të detyruar të largohen me shumë pak sende personale dhe kanë nevojë urgjente për ushqim dhe ujë. Situata është përkeqësuar më tej nga ofensivat e sotme tokësore.
Ajo gjithashtu raportoi për incidente të rënda, ku përkundër udhëzimeve për rrugë të sigurta, ka pasur raste të njerëzve të vrarë, të plagosur dhe të bllokuar. Mes tyre, edhe ambulanca me mjekë janë sulmuar, duke shkaktuar viktima dhe të plagosur.
Bollen e përshkroi këtë situatë si “jashtëzakonisht shqetësuese” dhe theksoi se dëmtimi i madh i infrastrukturës në Gaza po e bën krizën edhe më të rëndë. /mesazhi
