Mjekët okulistë rekomandojnë prindërit të bëjnë një vizitë të fëmijëve të tyre pranë specialistëve për të parë gjendjen e shikimit dhe për të kapur herët problematikat. Nëse një fëmijë i afrohet më shumë se 30-35 cm televizorit, librit apo telefonit, mjekët thonë se duhet bërë patjetër konsultë tek okulisti.
Nëse një fëmijë i moshës 5-6 vjeç i afrohet televizorit, telefonit dhe librit më shumë se 30-35 cm, duke shfaqur edhe problem si lotim apo dhimbje të syve, prindërit duhet ti bëjnë një vlerësim shikimit tek mjeku okulist.
Alketa Tandili: Janë disa shenja të vogla që prindërit duhet të jenë të kujdesshëm që nëse fëmija afrohet më shumë në libër, në fletore sesa 30-33 cm që është norma, vëren ndonjë devijim të syve, skuqje të syve, lotim, pulitje të syve, çdo lloj shenje e vogël mund të jetë ndihmë për ti paraprirë një problematike më të madhe më vonë.
Mjekja okuliste, Alketa Tandili, i sugjeron prindërve që përpara nisjes së shkollës të bëjnë një screening të shikimit të fëmijëve.
Alketa Tandili: Screening të shikimit. Kanë dalë shumë fëmijë me të meta të refraksionit, nuk janë patologji të shikimit por problematika të refraksionit të syve që duke u ndihmuar në moshën e duhur që është deri në 9 vjeç, bëjmë që të çojmë fëmijët në shikimin e plotë, funksion për të cilin sytë janë.
Ka disa rekomandimet përsa i takon leximit të librave. Është e shëndetshme të lexohet në vendet që ka dritë natyrale.
Mund të jetë një ambjent i jashtëm, në rastin e shtëpisë rekomadohet të lexohet pranë dritares, pozicionuar nga ana e majtë.
Alketa Tandili: Fëmijët duhet të harxhojnë shumë më shumë kohë në ambjente të hapura, në ambjente me gjelbërim. Me fillimin e përdorimit të ekraneve, përdorimin pa kriter të celularëve tek fëmijët, ne hasim gjithnjë e më shumë në moshat e vogla miopinë, që nuk është trendi i mioshës.
Mjekja okuliste është kundër shmangies totale të fëmijëve nga teknologjia, por rekomandon prindërit që të tregohen të kujdesshëm për tu lënë fëmijëve minutazhe të caktuara. Optimale është rreth 20 min.
