Çështja e integrimit europian mbetet një çështje delikate jo vetëm për qeverinë, por edhe për shqiptarët. Gjatë vitit të fundit jemi bombarduar me ultimatume nga Brukseli, një herë për reformën në drejtësi, pastaj vettingun dhe zbatimin e tij.
Kushtet sa vijnë e shtohen, deri në pikën sa shumë vetë bëjnë pyetjen nëse Europa i do apo jo shqiptarët.
Duket se ky frustrim ka arritur edhe në majën e qeverisë. Kryetari i saj, Edi Rama, pak ditë më parë, në një intervistë në një nga gazetat më të rëndësishme të Europës, “Der Standard”, ngriti për herë të parë gishtin e fajit nga Europa.
Në “Top Story” u diskutua nëse ka të drejtë kryeministri dhe nëse a i kemi bërë ne vërtet detyrat e shtëpisë.
Majlinda Bregu, ish-ministre e Integrimit, u shpreh: “Në 2013, kryeministri Edi Rama ishte më entuziast në deklaratat e tij, por sot duket më nervoz, ashtu si të gjithë liderët e rajonit.
Kushdo që është marrë me procesin e anëtarësimit, ka ndjesi frustracioni për një rrugë që zgjatet e zgjatet dhe ka të papritura. Procesi është i dyanshëm, por varet shumë nga plotësimi i detyrimeve tona.
Unë kam dyshime se ne jemi plotësisht të gatshëm për të hedhur hapin e radhës. Unë do doja që procesi të jetë pa ndërprerje, por frikë kam që nuk do të jetë e lehtë e ardhmja”.
Bregu theksoi se nuk është dakord “me Lulzim Bashën, i cili thotë se nuk jemi gati për nisjen e negociatave të anëtarësimit”./Mesazhi/
