KABUL (AA) – Politikani i njohur afgan dhe ish këshilltari ushtarak i presidentit të vendit Abdul Jabbar Qaharmaan është vrarë në sulmin me bombë mëngjesin e sotëm në provincën Helmand të Afganistanit, raporton Anadolu Agency (AA).
Zyra e guverantorit të provincës njofton se Qaharmaan u vra nga shpërthimi i bombës e cila ishte vendosur nën ulësen e tij në zyrën në qendër të qytetit Lashkargaha.
Zëdhënësi i guvernatorit të provincës Umar Zwak për AA ka thënë se nga shpërthimi janë vrarë dhe 3 të tjerë ndërsa 8 persona janë plagosur.
Qaharmaan ishte kandidat për deputet në Dhomën e Ulët të Parlamentit afgan (Wolesi Jirga) ndërsa përgjegjësinë për sulmin dhe vrasjen e tij e kanë marrë militantët talebanë.
Presidenti i vendit Ashraf Ghani ka dënuar ashpër sulmin ndërsa për Qaharmaan tha se ishte një trim dhe patriot i vërtetë.
Zgjedhjet parlamentare në Afganistan janë planifikuar për 20 tetor ndërkaq fushata parazgjedhore në vend është shoqëruar me shpërthime të shpeshta.
Javën e kaluar, të paktën 22 persona humbën jetën në sulmin me bombë në një tubim parazgjedhor në Tahkar.
Sulme të ngjashme morën dhjetëra jetë njerëzish në Helmand dhe Nangarhar.
Misioni i Asistencës së Kombeve të Bashkuara në Afganistan (UNAMA) shprehu shqetësim rreth shkallës së dhunës që ndodh përpara zgjedhjeve në vend.
