Një studiues australian i gjenomikës ka zhvilluar një test të ri të shqyrtimit të kancerit, i cili merr sekonda dhe mund të shpëtojë mijëra jetë, sipas mediave lokale të dielën.
Stefan Mazy, i cili zhvilloi DermR Patch me një ekip prej katër vetash, tha se një ditë mund të jetë një alternativë për një biopsi, e cila është metoda më e zakonshme për diagnostikimin e kancerit të lëkurës, raporton SBS News.
Teknologjia e parë në llojin e saj shfrytëzon fuqinë e mikrogjilpërave për të identifikuar lezionet kanceroze. Procesi është pa dhimbje dhe i shpejtë.
“Mikrogjilpërat janë më pak se një milimetër të gjata dhe ato depërtojnë rreth një milimetër në lëkurë dhe mbledhin një sasi mikro të indeve. Kur aplikojmë copëzën, e vendosim për rreth 15 sekonda. Ka pak presion, ka një lëvizje të lehtë përdredhëse për të marrë indin, dhe pastaj hiqet,” tha ai.
I gjithë procesi zgjat më pak se një minutë. Provat e para klinike u zhvilluan në rajonin Pilbara të Australisë Perëndimore në maj.
Ndërsa rezultatet përfundimtare janë ende në pritje, Mazy tha se rezultatet e hershme duken premtuese.
Një provë klinike e dytë dhe më e madhe ka të ngjarë të ndodhë brenda gjashtë deri në 12 muajve të ardhshëm.
