Tom Fletcher, nënsekretari i përgjithshëm i OKB-së për çështjet humanitare dhe koordinatori i ndihmave emergjente, deklaroi se “të gjitha pikat e hyrjes në Gazë janë të mbyllura”.
“Në kufi, ushqimi po kalbet. Ilaçet po skadojnë. Pajisjet jetësore mjekësore janë bllokuar,” shkroi ai në një postim në X.
“Nëse parimet bazë të së drejtës humanitare ende kanë vlerë, komuniteti ndërkombëtar duhet të veprojë për t’i mbrojtur ato,” shtoi Fletcher.
Ndërkohë, shefi i Agjencisë së OKB-së për Refugjatët Palestinezë (UNRWA), Philippe Lazzarini, paralajmëroi të premten se ndihmat nuk kanë hyrë në Gazë për më shumë se tre javë, duke e cilësuar këtë si bllokadën më të gjatë që nga fillimi i luftës.
