Presidenti i Këshillit të OKB-së për të Drejtat e Njeriut, Omar Zniber, ka bërë të ditur se 85 për qind e krimeve të kryera kundër gazetarëve mbeten të pandëshkuara në mbarë botën, duke e përshkruar atë si “të papranueshme”, transmeton Anadolu.
Zniber i bëri këto komente në një video-mesazh në një panel diskutimi mbi sigurinë e gazetarëve në kriza dhe emergjenca, si dhe drejtuesit ligjor që qëndrojnë pas mos-ndëshkimit, të mbajtur në Zyrën e OKB-së në Gjenevë, e cila u organizua nga zyra e OKB-së për të drejtat e njeriut dhe UNESCO.
Zniber tha se 61 gazetarë janë vrarë që nga fillimi i vitit 2024 pas shifrës së vitit të kaluar prej 71 gazetarësh, duke theksuar se “shifrat janë alarmante”.
Ai shtoi se më shumë se 300 gazetarë ndodhen pas hekurave dhe një numër prej tyre ngacmohen fizikisht ose online çdo ditë.
“Këto shifra ndoshta janë edhe më të ulëta se sa realiteti”, tha ai, duke u ankuar se sulmet kriminale ndaj gazetarëve “për fat të keq janë bërë një realitet i përditshëm”.
Konfliktet në mbarë botën, theksoi Zniber, po e përkeqësojnë problemin. Ai përmendi gjetjet e UNESCO-s që tregojnë se më shumë se 50 për qind e vrasjeve të gazetarëve kanë ndodhur në zonat e konfliktit në vitin 2023.
Sipas UNESCO-s, theksoi ai, të paktën 749 gazetarë dhe organe mediatike që mbulonin çështjet mjedisore ishin viktima të formave të ndryshme të sulmeve dhe frikësimit midis viteve 2009 dhe 2023.
“Më e keqja, shumica e krimeve kundër gazetarëve mbeten të pandëshkuara. Sipas të dhënave të fundit, 85 për qind e këtyre krimeve mbeten të pandëshkuara”, tha Zniber, duke theksuar se “është e papranueshme dhe urdhëron vëmendjen dhe veprimin tonë të plotë”.
Ai shprehu shpresë se diskutimet që po zhvillohen sot në panel do të forcojnë angazhimin e Këshillit të të Drejtave të Njeriut për mbrojtjen e të drejtave të gazetarëve dhe luftimin e mos-ndëshkimit të krimeve.
“Kjo është një nevojë urgjente, jetike dhe ai këshill duhet të fokusohet në këtë dhe të luajë një rol të plotë mbrojtës për të mbrojtur të drejtat e gazetarëve”, tha ai.
