Shtetet e Bashkuara të Amerikës pranuan se të gjithë ata që u vranë në sulmin ajror pranë Aeroportit të Kabulit në Afganistan ishin civilë.
Gjenerali Kenneth Frank McKenzie, komandanti i Komandës Qendrore të Shteteve të Bashkuara (CENTCOM) kërkoi falje për sulmin, duke deklaruar se të 10 personat që humbën jetën në sulmin ajror të kryer nga vendi i tij pranë Aeroportit Kabul në Afganistan më 29 gusht ishin civilë.
McKenzie njoftoi rezultatin e hetimit mbi sulmin ajror amerikan më 29 gusht pranë Aeroportit të Kabulit.
Duke u lidhur online në konferencën e përditshme për shtyp të zëdhënësit të Departamentit Amerikan të Mbrojtjes (Pentagon), John Kirby, McKenzie tha: “Ne arritëm në përfundimin se rreth 10 civilë vdiqën në sulm, 7 prej të cilëve ishin fëmijë. Për më tepër, ata që ishin në automjetin e shënjestruar të këtij sulmi ose ata që vdiqën nuk kishin lidhje me DAESH/K ose nuk paraqesnin asnjë rrezik të drejtpërdrejtë për forcat amerikane.”
McKenzie shprehu ngushëllimet e tij për familjet e atyre që humbën jetën në sulm, duke thënë: “Ky sulm ishte për të shmangur rrezikun e menjëhershëm për forcat tona dhe civilët që ne evakuuam. Unë kërkoj falje të përzemërt. Si komandant, unë marr përgjegjësinë e plotë për këtë sulm.” /trt
