Shqipëria mund të jetë një vend me destinacione shumë të bukura turistike dhe jo vetëm. Vendi ynë mund të bëhet atraksion edhe për personat që pëlqejnë ushtrinë dhe sekretet që ajo ofron.
Duke pasur të parasysh të kaluarën e Shqipërisë, ku në komunizëm u ndërtuan me qindra mijëra bunkerë, tunele dhe baza ushtarake, kjo mund të jetë një pikësynim në të ardhmen për të tërhequr sadopak turistë. Dhe në fakt, këtë herë, është një media e huaj e cila është ndalur dhe ka konsideruar bazën ajrore të Gjadrit si një prej bazave ushtarake sekrete përreth botës.
“Baza Ajrore e Gjadrit është një bazë e kohës së komunizmit e cila është ndërtuar në një kodër në Shqipërinë Veriore”, shkruan Sofrep.
Duke filluar nga vitet 1970, kjo bazë ka qenë shtëpia e avionëve MiG dhe aeroplanëve sovjetikë e kinezë të asaj kohe. Baza e Gjadrit ishte e “varrosur” në një anë të malit dhe thuhet se brenda kishte disa tunele. Tashmë është jashtë përdorimit, por dikur ishte një labirint tunelesh, mjetesh ajrore dhe burrash që luftonin.
“Një gjë e pabesueshme për këtë bazë ishte se avionët do të fluturonin nga Gjadri nga ana e një mali. Pilotëve u është thënë se duhet të siguroheshin që të mos ktheheshin gjatë ngjitjes sepse rrezikonin përplasjen me anën e malit ku ishte vendosur baza”, shkruan më tej Sofrep.
“Banorët” kryesorë të Gjadrit ishin avionët MiG-19, MiG-17 dhe MiG-21. Shumica e tyre qëndrojnë ende në Gjadër, por zyrtarët shqiptarë kanë menduar për shitjen e tyre. Po ashtu mendohet që një pjesë e konsiderueshme e tyre të vendosen në muze të ndryshme në Shqipëri.
Baza ajrore e Gjadrit i përshtatet në mënyrë perfekte mijëra bunkereve që tregojnë realitetin e Shqipërisë komuniste. E gjithë kjo infrastrukturë u ndërtua nga Enver Hoxha, pas frikës nga pushtimi të huajve. Fluturimi i fundit nga Gjadri u krye në vitin 2004. Kur e sheh të braktisur është shumë e vështirë për të besuar se dy dekada më parë ishte e mbushur me tunele, ushtarë dhe avionë luftarakë gati për çdo moment për vendin.
Megjithatë mund të ketë dritë në fund të tunelit edhe për Gjadrin pasi po mendohet që të hapet ose për turizëm ose të rikthehet për përdorim ushtarak edhe njëherë./tvklan
