Sekretari Amerikan i Shtetit, Marco Rubio, do të udhëtojë në Bruksel nga 2 deri më 4 prill për të marrë pjesë në Takimin e Ministrave të Jashtëm të NATO-s, njoftoi Departamenti i Shtetit të hënën.
Duke folur në një konferencë për shtyp, zëdhënësja Tammy Bruce tha se vizita e Rubios do të fokusohet në nxitjen e rritjes së investimeve në mbrojtje nga aleatët e NATO-s dhe në forcimin e mbështetjes për Ukrainën.
“Sekretari i Shtetit, Marco Rubio, do të udhëtojë në Bruksel, Belgjikë, nga 2 deri më 4 prill,” tha Bruce, duke theksuar se diplomati i lartë amerikan do të nënvizojë rëndësinë e “shtimit të investimeve në mbrojtje nga aleatët dhe sigurimin e një paqeje të qëndrueshme në Ukrainë.”
Rubio pritet gjithashtu të trajtojë kërcënimin strategjik në rritje nga Kina, sipas vlerësimeve të Uashingtonit, gjatë një sesioni të veçantë të NATO-s me partnerët e Indo-Paqësorit.
“Ai do të theksojë kërcënimin e përbashkët që paraqet Kina për aleancat Euro-Atlantike dhe Indo-Paqësore,” shtoi Bruce.
Përveç këtyre prioriteteve, Rubio do të mbajë diskutime mbi përgatitjet për samitin e ardhshëm të NATO-s, i cili do të mbahet këtë verë në Hagë.
Takimi në Bruksel zhvillohet në një periudhë me tensione të larta globale, me aleatët e NATO-s që po kërkojnë angazhime më të forta për mbrojtjen kolektive dhe koordinim më të thellë mbi sfidat e reja të sigurisë globale. /mesazhi
