Kancelari i ardhshëm gjerman, Olaf Scholz, tha të martën se është në favor të vaksinimit të detyrueshëm kundër COVID-19 për të frenuar shpërthimin e infeksioneve në vendin e tij.
“Olaf Scholz perceptoi se ka debate për këtë temë në Bundestag, përfshirë të gjitha partitë”, njoftoi një burim në rrethin e kancelarit të ardhshëm socialdemokrat.
Pasardhësi i Angela Merkelit, sipas këtij burimi, ka “sinjalizuar simpatinë e tij për një rregullim të tillë” gjatë një takimi me Merkelin dhe krerët e 16 landeve gjermane, gjë që mund të çojë në një shtrëngim të kufizimeve kundër COVID-19.
Mbyllja e lokaleve dhe klubeve janë veçanërisht në konsideratë, sipas medieve gjermane.
Gjermania, deri më tani, e ka përjashtuar opsionin radikal të detyrimit të vaksinimit.
Detyrimi i vaksinimit u vendos së fundmi për personelin në shtëpitë e të moshuarve dhe spitale, si edhe për ushtarët e Bundeswehr-it dhe pritet të hyjë në fuqi së shpejti.
Megjithatë, situata shëndetësore vazhdon të jetë shumë e tensionuar, me një incidencë prej 452,2 për 100 000 banorë të martën.
Fushata e vaksinimit ka mundësuar vaksinimin e plotë të rreth 57 milionë personave (68,5%) në këtë datë.
Vaksinimi i detyrueshëm, i refuzuar prej kohësh nga shumica e gjermanëve, tani kërkohet nga gati dy të tretat e tyre (64%), sipas një sondazhi të fundit nga mediet RTL dhe NTV. /atsh
