Kancelari gjerman Olaf Scholz kritikoi të martën miliarderin e teknologjisë Elon Musk për mbështetjen e partive dhe lëvizjeve politike të ekstremit të djathtë në Evropë.
“Ne kemi lirinë e fjalës në Evropë dhe në Gjermani, secili mund të thotë çfarë të dojë”, tha Scholz para një auditori ndërkombëtar në Forumin Ekonomik Botëror (WEF) në Davos.
“Ajo që ne nuk pranojmë është nëse është duke mbështetur pozicione të ekstremit të djathtë, dhe kjo është ajo që unë do të doja të përsërisja sërish,” tha ai.
Scholz i bëri komentet në përgjigje të një pyetjeje në lidhje me gjestin kontrovers të Musk me dorën të hënën, gjatë një fjalimi që festonte inaugurimin e presidentit amerikan Donald Trump.
Musk vendosi dorën e djathtë dy herë mbi zemrën e tij përpara se të zgjaste krahun lart, një gjest që disa përdorues të mediave sociale e krahasuan me përshëndetjen e fitores “Sieg Heil” të përdorur nga Adolf Hitleri dhe nazistët.
Më vonë, Musk mohoi në X se ishte një përshëndetje naziste. “Sinqerisht, ata kanë nevojë për truke të pista më të mira. Sulmi ‘të gjithë janë Hitler’ është (shumë) i lodhur,” tha ai.
Në fillim të këtij muaji, Musk tërhoqi kritika të ashpra nga establishmenti politik i Gjermanisë duke mbështetur partinë e ekstremit të djathtë Alternativa për Gjermaninë (AfD) përpara zgjedhjeve të përgjithshme të 23 shkurtit. Qeveria gjermane e ka akuzuar Muskun se po përpiqet të ndikojë në fushatën zgjedhore të vendit përmes mbështetjes së tij për AfD-në.
