Sekretari amerikan i Shtetit, Marco Rubio, ka bërë të ditur se SHBA-ja anuloi të paktën 300 viza studentore të huaja si pjesë e goditjes së vazhdueshme ndaj studentëve dhe akademikëve pro-palestinezë, transmeton Anadolu.
Duke folur në një konferencë për media në Guajana, Rubio sugjeroi se numri aktual mund të jetë edhe më i lartë.
“Ndoshta më shumë, mund të jenë më shumë se 300 në këtë pikë”, tha Rubio kur u pyet për një raport nga ‘Axios’.
“Ne e bëjmë atë çdo ditë. Sa herë që gjej një nga këta të çmendur, unë ia heq vizën”, tha Rubio, duke theksuar angazhimin e tij ndaj politikave më të rrepta të imigracionit.
Më herët, ‘Axios’ raportoi se zyrtarët e administratës amerikane po konsiderojnë ndalimin e disa kolegjeve nga pranimi i studentëve të huaj që konsiderohen “pro-Hamas”.
Rubio gjithashtu konfirmoi revokimin e vizës së studentes turke Rumeysa Ozturk dhe mbrojti arrestimin e saj pas një artikulli që ajo shkroi duke kritikuar Izraelin.
Megjithatë, Rubio nuk dha asnjë provë që e lidh studentet turke me dhunën. Miqtë dhe familja e saj thonë se ajo u arrestua pas një fushate nga ‘Canary Mission’, një faqe interneti pro-izraelite që fut në listën e zezë studentë dhe aktivistë pro-palestinez, pas një shkrimi që ajo shkroi në vitin 2014 që kritikonte Izraelin.
Ozturk, një studente turke e doktoraturës në Universitetin Tufts, u arrestua të martën nga forcat e Emigracionit dhe Zbatimit të Doganave të SHBA-së (ICE) pranë shtëpisë së saj në Somerville, derisa po shkonte për një darkë iftari.
Një video virale kapi momentin e ndalimit të saj, ku shfaqen persona të maskuar duke e vënë në pranga dhe duke i marrë me forcë telefonin.
Arrestimi i studentes turke vjen në mes të goditjes më të gjerë të administratës së Trumpit ndaj studentëve dhe akademikëve pro-palestinezë, duke përfshirë aktivistin palestinez dhe të diplomuarin në Universitetin Columbia, Mahmoud Khalil dhe studiuesin në Universitetin Georgetown, Badar Khan Suri.
