Të paktën 33 palestinezë të tjerë janë vrarë në sulmet izraelite në Rripin e Gazës, duke e çuar numrin e përgjithshëm të të vdekurve që nga tetori i vitit të kaluar në 44.363, tha sot Ministria e Shëndetësisë e enklavës, transmeton Anadolu.
Në një deklaratë, ministria tha po ashtu se rreth 105.070 persona janë plagosur nga sulmet izraelite që po vazhdojnë. “Forcat izraelite vranë 33 persona dhe plagosën 137 të tjerë në tri masakra ndaj familjeve në 24 orët e fundit”, tha ministria.
“Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i marrin ata”, shtoi ajo.
Izraeli ka nisur një luftë gjenocidale në Rripin e Gazës pas një sulmi ndërkufitar nga grupi palestinez Hamas në tetor të vitit të kaluar.
Tashmë në vitin e dytë, gjenocidi në Gaza ka shkaktuar reagime ndërkombëtare në rritje, me zyrtarë dhe institucione që i etiketojnë sulmet dhe bllokimin e dërgesave të ndihmave si një përpjekje të qëllimshme për të shkatërruar popullsinë palestineze.
Javën e kaluar, Gjykata Ndërkombëtare Penale (GJNP) lëshoi urdhra arresti për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me akuza për gjenocid në Gjykatën Ndërkombëtare të Drejtësisë (GJND) për luftën e tij vdekjeprurëse në Gaza.
