Të paktën 37.598 palestinezë janë vrarë në ofensivën e vazhdueshme të Izraelit në Rripin e Gazës që nga tetori i kaluar, tha sot Ministria e Shëndetësisë në enklavën e rrethuar, transmeton Anadolu.
Ministria tha në një deklaratë se 86.032 njerëz të tjerë janë plagosur gjithashtu nga sulmet, shumica prej tyre, gra dhe fëmijë.
“Sulmet izraelite vranë 47 persona dhe plagosën 121 të tjerë vetëm në 24 orët e fundit”, thuhet në deklaratë.
Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ata, shtoi ministria.
Izraeli, duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, ka vazhduar ofensivën e tij brutale në Gaza që nga sulmi i 7 tetorit 2023 nga grupi palestinez Hamas.
Mbi tetë muaj pas fillimit të luftës izraelite, pjesë të mëdha të Gazës janë në gërmadha, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj.
