Qindra demonstrues propalestinezë u mblodhën në San Francisco të SHBA-së mbrëmë për të festuar armëpushimin e arritur në Rripin e Gazës, raporton Anadolu.
Demonstruesit u mblodhën jashtë Ndërtesës Federale në San Francisco, ku po ashtu protestuan kundër agresionit të Izraelit kundër Palestinës.
Në tubim, demonstruesit valëvitën flamuj palestinezë, mbanin pankarta dhe brohoritnin slogane në mbështetje të Palestinës.
Katari njoftoi një marrëveshje armëpushimi të mërkurën për t’i dhënë fund sulmeve vdekjeprurëse izraelite mbi 15-mujore në Rripin e Gazës.
Kryeministri dhe ministri i Jashtëm i Katarit, Sheikh Mohammed bin Abdulrahman Al Thani, tha se marrëveshja trefazore do të hyjë në fuqi të dielën.
Marrëveshja përfshin shkëmbimin e të burgosurve dhe qetësi të qëndrueshme, duke synuar një armëpushim të përhershëm dhe tërheqjen e forcave izraelite nga Gaza.
Gati 46.800 palestinezë, kryesisht gra dhe fëmijë, janë vrarë dhe më shumë se 110.000 janë plagosur në luftën gjenocidale të Izraelit në Gaza që nga 7 tetori 2023, sipas autoriteteve lokale shëndetësore.
Gjykata Ndërkombëtare Penale lëshoi urdhra arresti në nëntor për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.
