Protestuesit në Japoni i kanë kërkuar Hungarisë të arrestojë kryeministrin izraelit Benjamin Netanyahu, i cili pritet të takohet me homologun e tij hungarez Viktor Orban sot në mbrëmje në Budapest, për shkak të gjenocidit në Gaza, transmeton Anadolu.
Netanyahu ka filluar vizitën e tij katërditore në Hungari, pavarësisht një urdhri arresti të Gjykatës Ndërkombëtare Penale (GJNP) mbi akuzat për krime lufte në Gaza.
Hungaria, anëtare e GJNP-së, është e detyruar të arrestojë dhe të dorëzojë këdo që i nënshtrohet një urdhëri nga gjykata.
Kryeministri i Hungarisë Orban ishte ndër të parët që dënoi urdhrin e GJNP-së. Duke e cilësuar si cinik, ai kishte thënë se liria e Netanyahut do të garantohej kur të dëshironte ta vizitonte vendin.
Sipas një videoje, protestuesit kanë zhvilluar protestë jashtë misionit diplomatik të Hungarisë në Tokio.
Duke ngritur slogane si “Bojkoto Izraelin”, “Terroristi Netanyahu”, “Krimineli Netanyahu”, protestuesit kërkuan arrestimin e menjëhershëm të kryeministrit izraelit në Budapest.
Në një postim në X, aktivisti japonez Thoton Akimoto i bëri thirrje Hungarisë që të arrestojë kryeministrin izraelit “pas mbërritjes së tij dhe ta dorëzojë” atë në GJNP.
“Ai është një kriminel lufte i dyshuar, i akuzuar për përdorimin e urisë si një metodë lufte, sulme të qëllimshme ndaj civilëve dhe akte të tjera çnjerëzore”, tha Akimoto.
Grupet e të drejtave “Amnesty International” dhe “Human Rights Watch” i kanë bërë gjithashtu thirrje Hungarisë që të arrestojë Netanyahun kur ai të shkelë në vend.
Izraeli, në fushatën e tij ushtarake që nga tetori i vitit 2023, ka vrarë më shumë se 50.000 njerëz në Gaza dhe e ka kthyer enklavën në rrënoja.
