Qytetarët e Sarajevës u mblodhën sot në sheshin qendror në Bashçarshi afër Sebilit për të mirëpritur armëpushimin në Gaza.
Të mbledhurit i kërkuan komunitetit ndërkombëtar të sigurojë paqe të qëndrueshme për popullin e vuajtur të Gazës dhe Palestinës në tërësi.
Javën e kaluar, të mërkurën, kur në kryeqytetin e Katarit u ra dakord për një armëpushim në Gaza, banorët e Sarajevës, Mostarit dhe qyteteve të tjera në Bosnjë e Hercegovinë festuan paqen e shumëpritur me një paradë në kolonë makinash.
Kryeministri dhe ministri i Jashtëm i Katarit, Mohammed bin Abdulrahman, njoftoi të mërkurën e kaluar në mbrëmje, më 15 janar, se ishte arritur një marrëveshje armëpushimi në Rripin e Gazës, duke theksuar se zbatimi i saj do të fillojë të dielën, më 19 janar, në orët e mëngjesit.
Bin Abdulrahman theksoi se Katari, Egjipti dhe Shtetet e Bashkuara do të “punojnë për të siguruar zbatimin e marrëveshjes”, me mekanizma të vendosur për ta monitoruar zbatimin e saj dhe për të adresuar shkeljet e mundshme.
Pas arritjes së armëpushimit, shumë banorë të Gazës të zhvendosur u drejtuan për në shtëpitë e tyre, duke shpresuar të rindërtonin jetën e tyre në rrënojat e shtëpive të tyre të djegura.
U ra dakord gjithashtu për një shkëmbim pengjesh, me Hamasin duke liruar tashmë disa izraelitë të arrestuar, ndërsa forcat izraelite njoftuan lirimin e disa qindra palestinezëve të burgosur, kryesisht në Bregun Perëndimor.
Edhe pse armëpushimi është në fuqi, forcat izraelite vazhdojnë të hapin herë pas here zjarr ndaj Gazës, e cila vazhdon të shkaktojë vdekje dhe vuajtje për palestinezët. Më shumë se 150 palestinezë janë vrarë që nga vendosja e armëpushimit.
Përndryhe, në sulmet në Rripin e Gazës që nga 7 tetori 2023, më shumë se 46.000 palestinezë janë vrarë dhe më shumë se 110.000 njerëz janë plagosur.
Në nëntor 2024, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën në enklavë.
