Presidenti turk Recep Tayyip Erdoğan kryesoi një mbledhje sigurie në Istanbul, një ditë pas sulmit terrorist në kryeqytetin Ankara, ku u vranë pesë persona dhe u plagosën 22 të tjerë, transmeton Anadolu.
Erdoğan u kthye nga qyteti rus i Kazanit, ku shkoi për të marrë pjesë në samitin e 16-të të BRICS-it.
Ndër të pranishmit në takim ishin ministri i Jashtëm Hakan Fidan, ministri i Mbrojtjes Kombëtare Yaşar Güler, ministri i Brendshëm Ali Yerlikaya, shefi i Shtabit të Përgjithshëm gjeneral Metin Gürak dhe shefi i Organizatës Kombëtare të Inteligjencës (MIT) Ibrahim Kalın.
Drejtori i Komunikimeve i Presidencës Fahrettin Altun, presidenti i Industrive të Mbrojtjes i Presidencës Haluk Görgün, këshilltari presidencial për politikën e jashtme dhe sigurinë Akif Çağatay Kılıç dhe zëdhënësi i AK Partisë Ömer Çelik ishin gjithashtu të pranishëm në takimin në zyrën shtetërore të Aeroportit Ataturk.
Takimi u fokusua në sulmin terrorist të së mërkurës ndaj Industrive Turke të Aviacionit dhe Hapësirës (TUSAŞ) në rrethin Kahramankazan të Ankarasë dhe hapat e nevojshëm në luftën e vazhdueshme kundër terrorizmit.
Zyrtarët përsëritën angazhimin e Turqisë për të luftuar terrorizmin dhe theksuan se vendi nuk do të lejojë krijimin e një “shteti terrorist” përtej kufijve të tij.
Një shpërthim dhe të shtëna armësh u dëgjuan të mërkurën në objektet e TUSAŞ-it në rrethin Kahramankazan të Ankarasë.
Ministri i Brendshëm turk Ali Yerlikaya tha se pesë persona u vranë dhe 22 të tjerë u plagosën në sulm, ndërsa dy terroristë që sulmuan objektet u “neutralizuan”.
Yerlikaya njoftoi se terroristët e neutralizuar përgjegjës për sulmin u identifikuan si anëtarë të grupit terrorist PKK.
Në fushatën e saj terroriste më shumë se 40-vjeçare kundër Turqisë, PKK, e listuar si organizatë terroriste nga Turqia, SHBA-ja dhe BE-ja, ka qenë përgjegjëse për vdekjen e 40.000 njerëzve.
