Popullsia e moshuar e Gjermanisë po rritet me shpejtësi, me qeverinë që parashikon se numri i njerëzve të moshës 80-vjeç e lart, aktualisht në 6 milionë, pritet të rritet në mes 8 dhe 10 milionë deri në vitin 2050, transmeton Anadolu.
Qeveria zbuloi “raportin e 9-të të plakjes” ku parashikoi rritje të numrit të të moshuarve që kanë nevojë për kujdes derisa popullsia po plaket. Numri i njerëzve që kërkojnë kujdes, i cili ishte 5.7 milionë në vitin 2023, parashikohet të arrijë në 7.6 milionë deri në vitin 2055.
Raporti prej 250 faqesh, që fokusohet në kushtet e jetesës së të moshuarve, u prezantua në një konferencë për media në Berlin nga Lisa Paus, ministre për Çështjet e Familjes, të Moshuarve, Grave dhe të Rinjve.
Raporti mbulon aspekte të tilla si siguria financiare, punësimi, kujdesi, shëndeti, strehimi, lidhjet sociale, përfshirja politike dhe marrëdhëniet.
Duke folur në prezantimin e raportit, Paus tha se raporti i plakjes tregon qartë se sa të ndryshme janë realitetet e jetesës së të moshuarve në Gjermani, siç tha ajo, një diversitet “jo vetëm që duhet pranuar, por edhe duhet promovuar në mënyrë aktive”.
“Pavarësisht gjinisë, origjinës apo statusit social, të gjithë të moshuarit duhet të kenë mundësi të barabartë për pjesëmarrje”, tha ajo.
Ministrja gjermane theksoi se shumë gra me sfond migrimi ende përballen me disavantazhe.
Ajo shtoi se ministria që drejton ajo po punon për strategji, përfshirë trajtimin e vetmisë, për të forcuar kohezionin social dhe për të siguruar një jetë të rehatshme dhe të sigurt për të moshuarit.
