Ministria e Punëve të Jashtme të Polonisë ka reaguar lidhur me vrasjen e punonjësve të organizatës ndërkombëtare të ndihmës me bazë në SHBA, “World Central Kitchen” (WCK) në sulmin e Izraelit në Gaza, transmeton Anadolu.
Në llogarinë në rrjetet sociale X të Ministrisë së Jashtme polake është bërë një deklaratë në lidhje me vrasjen e 7 anëtarëve të personelit të organizatës së ndihmës WCK, të cilët morën pjesë në përpjekjet për ndihma ushqimore në Gaza, në sulmin izraelit.
Në deklaratë thuhet se një shtetas vullnetar polak ishte në mesin e atyre që humbën jetën në sulm dhe se familjes së vullnetarit i shprehën ngushëllimet më të thella. “Ne kundërshtojmë mosrespektimin e ligjit ndërkombëtar humanitar dhe mos mbrojtjen e civilëve (në Gaza), përfshirë punëtorët humanitarë”, thuhet në deklaratë.
– Ministri polak kërkoi deklaratë nga ambasadori izraelit në Varshavë
Ministri i Jashtëm polak, Radoslaw Sikorski, në deklaratën në llogarinë e tij në rrjetet sociale X, tha se kontaktoi menjëherë ambasadorin e Izraelit në Varshavë, Yacov Livne dhe kërkoi deklaratë nga ai për këtë çështje.
Sikorski gjithashtu shprehu ngushëllimet e tij për familjen e punonjësit të ndjerë të ndihmës humanitare dhe të gjithë viktimave civile në Gaza.
– Në sulmin izraelit u vranë 7 punonjës të ndihmës
Në rajonin Deir el-Belah të Gazës, një kolonë që transportonte punonjës të organizatës ndërkombëtare të ndihmës me bazë në SHBA, “World Central Kitchen” (WCK) u qëllua nga ushtria izraelite. Në sulm humbën jetën 7 persona nga Australia, Polonia, Britania e Madhe, SHBA-Kanadaja dhe Palestina.
Thuhet se pas sulmit, WCK menjëherë ka ndërprerë operacionet e saj në rajon dhe së shpejti do të merret një vendim për punën në të ardhmen.
