Polonia po avancon programin e saj ambicioz të armatimit me dy marrëveshje të mëdha të mbrojtjes me vlerë 17 miliardë zloti polake (4,15 miliardë dollarë), njoftoi të hënën ministri i Mbrojtjes Wladyslaw Kosiniak-Kamysz, transmeton Anadolu.
Në një postim në X pas vizitës së tij në Huta Stalowa Wola, një degë e Grupit shtetëror Polak të Armatimit, Kosiniak-Kamysz theksoi rëndësinë e këtyre marrëveshjeve, duke i quajtur ato disa nga blerjet më të mëdha të armëve në historinë e Polonisë.
Marrëveshjet përfshijnë blerjen e 96 obusëve vetëlëvizës KRAB, së bashku me mjetet komanduese dhe ngarkuese të municioneve, dhe 250 automjete mbështetëse për obusët vetëlëvizës K9 të prodhuar në Korenë e Jugut që tashmë gjenden në inventarin e ushtrisë polake.
“Afro 17 miliardë zloti do të shkojnë në industrinë tonë të mbrojtjes dhe pajisjet më të mira do të shkojnë për Forcat e Armatosura Polake”, tha ministri.
