Policia izraelite ka vendosur të hetojë Sara Netanyahun, gruan e kryeministrit Benjamin Netanyahu, për dyshimin se ka “penguar drejtësinë”, transmeton Anadolu.
Korporata e Transmetimeve Publike izraelite raportoi se policia planifikon të nisë një hetim ndaj Sara Netanyahut për shqetësimin e një dëshmitari dhe prishjen e rrjedhës së drejtësisë.
Masa vjen pasi një raport i fundit hetimor i transmetuar në programin Uvda të Channel 12 paraqiti prova që sugjeronin përfshirjen e Sara Netanyahut në organizimin e protestave kundër prokurores në gjyqin e bashkëshortit të saj, Liat Ben-Ari, si dhe kundër një prej dëshmitarëve, Hadas Klein.
Prokurori i Përgjithshëm izraelit Amit Aisman dhe këshilltari ligjor i qeverisë, Gali Baharav-Miara, lëshuan një deklaratë mbrëmë vonë duke konfirmuar se policia ishte udhëzuar të vazhdonte me hetimin pas transmetimit.
Raporti sugjeron se Sara Netanyahu mund të thirret për t’u marrë në pyetje ose për të dhënë dëshmi në këtë rast.
Ky vendim ka tërhequr kritika të forta nga anëtarët e qeverisë izraelite, duke përfshirë ministrin e Drejtësisë Yariv Levin, Ministrin e Sigurisë Kombëtare Itamar Ben-Gvir dhe Kryetarin e Knessetit Amir Ohana. Ata akuzuan këshilltarin Baharav-Miara se ka zbatuar ligjin në mënyrë selektive për arsye politike, duke e quajtur atë një “krim”.
Ky zhvillim vjen pasi kryeministri izraelit Benjamin Netanyahu doli në gjykatë për herë të gjashtë të martën për t’iu përgjigjur akuzave për korrupsion.
Netanyahu filloi të dëshmonte në dhjetor 2023 në lidhje me akuzat për ryshfet, mashtrim dhe shkelje të besimit, që kur u akuzua më 2019.
Procedurat ligjore kundër Netanyahut filluan në vitin 2020 dhe janë ende në vazhdim, ndërsa Netanyahu mohon të gjitha akuzat dhe pretendon se çështja është pjesë e një fushate politike për ta hequr atë nga detyra.
Muajin e kaluar, Gjykata Ndërkombëtare Penale lëshoi urdhrarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
