Policia britanike njoftoi se ka arrestuar një burrë të dyshuar për vrasjen e Sabina Nessa-s, mësueses së shkollës fillore e cila u vra teksa po shëtiste në një park të Londrës, transmeton Anadolu Agency (AA).
Vdekja e Nessa-s, ndërsa ajo shkoi të takonte një shoqe pak minuta nga shtëpia e saj, ka nxitur shqetësimet se gratë nuk janë të sigurta në rrugët e kryeqytetit të Britanisë.
Forcat e Policisë Metropolitane thanë se një 38-vjeçar u arrestua gjatë natës në Anglinë jugore. Dy burra të tjerë janë arrestuar më parë dhe më pas janë liruar nën hetim, por policia theksoi se arrestimi i fundit ishte një “zhvillim i rëndësishëm”.
Policia kishte publikuar më parë pamjet televizive të një burri i cili u pa për rreth rrugës së Nessa-s natën kur ajo u vra, duke i kërkuar kujtdo që e njihte që t’i kontaktonte menjëherë.
Nessa, 28 vjeçe, u gjet e vdekur në Kidbrooke, në juglindje të Londrës, më 17 shtator. Detektivët besojnë se ajo u sulmua gjatë kohëzgjatjes pesë minuta në këmbë për të takuar një shoqe në pijetore aty pranë.
Qindra njerëz mbajtën manifestim të heshtur përkujtimor për Nessa-n të premten, duke kërkuar dhënien fund dhunës kundër grave.
“Kjo ndihet sikur ne kemi ngecur në një ëndërr të keqe dhe nuk mund të dalim prej saj. Bota jonë është shkatërruar, ne thjesht nuk kemi fjalë”, tha para turmës motra e Nessa-s, Jebina Yasmin Islam. “Asnjë familje nuk duhet të kalojë atë që po kalojmë ne”, shtoi ajo.
Vdekja e Nessa-s erdhi gjashtë muaj pas rrëmbimit, përdhunimit dhe vrasjes së 33-vjeçares Sarah Everard në jug të Londrës nga një oficer policie në shërbim. Rasti Everard tronditi vendin dhe mijëra njerëz dolën në rrugë për të denoncuar dhunën kundër grave. /aa
