Aktivistët e grupit “Asnjë cent më shumë” janë arrestuar sot nga Policia e Kosovës, gjatë një aksioni që zhvilluan para objektit të ZRRE-së.
Pas arrestimit të tyre, ky grup ka reaguar duke thënë se shteti është në shërbim të KEDS.
Në një reagim për media “Asnjë cent më shumë” thekson se policia arrestoi brutalisht 12 qytetarë.
“Pas Presidentes, Ministrisë së Ekonomisë dhe ZRRE-së, stafeta kaloi te Policia e Kosovës. Të gjithë në mbrojtje të interesit privat. Të gjithë bashkë në ruajtjen dhe garantimin e përfitimeve të KEDS-it. Presidentja e Qeveria përmes ZRRE-së, përmes propozimeve dhe vendimeve politike kurse policia e Kosovës përmes grushtave dhe shufrave metalike”, thuhet në reagim.
Tutje në reagim thuhet se në orën 08:00 kur edhe fillon orari zyrtar i punës së ZRRE-së, aktivistët/et e iniciativës “Asnjë Cent Ma Shumë” bllokuan zyret e ZRRE-së.
“Me zell të pakuptueshëm nga ana e pjesëtarëve të policisë, janë arrestuar dhe rrahur 12 aktivistë/e. Janë rrahur egërsisht vetëm pse po protestonin kundër rritjes edhe ashtu të rritur të çmimit të energjisë. Të rrahur/a dhe të arrestuar/a po mbahen në polici. Ne kërkojmë lirimin e menjëhershëm të tyre, kurse qytetarët/et i ftojmë të na bashkohen te zyrat e ZREE-së. Asnjë zyrtar i ZRRE nuk mund të punojë aty”, thuhet në reagim.
Grupi “Asnjë cent më shumë” ka shtuar se do të vazhdojnë të kundërshtojnë rritjen e çmimit të energjisë elektrike.
“Jo deri në një zotim se nuk kanë për të aprovuar asnjë rritje. Deri atëherë ai nuk është vendi i tyre i punës. Deri atëherë ne jemi dhe duhet te jemi në bllokadë”, thuhet në reagim.
